BACOLOD CITY — Dismayado si Hinigaran Mayor Jose Naddie Arceo sa kapulisan sang ila nga banwa bangud sa indi pagkonsulta sa iya angot sa presensya sang isa ka bigtime drug lord sa ila nga banwa.
Sa exclusive interview sang Bombo Radyo, ginpahayag ni Arceo nga sa ginhiwat nga Municipal Anti-Drug Abuse Council ukon MADAC meeting sang tinalikdan nga inadlaw, ginpresentar sang kapulisan, sa pagpanguna sang ila hepe nga si Police Chief Insp. Jerald Lawrence Bathan, nga wala na sa ila nga banwa si Jessie Ramos, ang bigtime druglord nga duha ka dekada na nga imbolbado sa ilegal nga druga kag sa mga kaso sang pagpamatay.
Suno kay Arceo, wala sang konsultasyon nga ginhimo ang kapulisan antes nila ginpalayag ang amo nga report sa MADAC meeting.
Dismayado ang alkalde bangud nakahibalo ini nga nagapadayon sa operasyon sa ilegal nga druga si Ramos, liw-as sa report sang kapulisan kag subong man sang Philippine Drug Enforcement Agency (PDEA), nga nagkakas na sa druglord sa ila nga order of battle.
Suno kay Mayor Arceo, wala ini nanamian sa ginhimo nga pagpatalang sang kapulisan kag ang pagpabulag-bulag sang mga ini sa drug situation sa pihak sang paghatag niya sang impormasyon sa mga otoridad.
Nahibaluan nga nagdangop si Arceo sa Task Force Kasanag nga amo naman ang magapalab-ot sini sa talatapan ni Presidente Rodrigo Duterte, PNP Chief Director General Ronald dela Rosa kag PDEA Director General Isidro Lapeña.
May kaangtanan sini, luyag ni Arceo nga pailisan ang hepe sang kapulisan sa ila nga banwa.
Ginpahayag ni Arceo nga nagpadala na ini sang sulat kay Negros Occidental Police Provincial Office Director Police Senior Supt. Rodolfo Castil agud hingyuon nga ilisan ang ila hepe nga si Police Chief Insp. Bathan.
Ini bangud sang indi pagkoordinar sang kapulisan, sa pagpanguna ni Bathan, sang ila mga tikang, partikular angot sa kampanya kontra ilegal nga druga.
Suno kay Mayor Arceo, luyag sini nga siya na gid ang magapili sang masunod nga hepe sang kapulisan sa banwa sang Hinigaran agud may control siya sa mga ini, indi kaangay subong nga siya pa ang ginakana sang mga pulis.
