Magasapol ang alkalde sa banwa sang Murcia sa nagkalainlain nga ahensya sang gobyerno upod sa tag-iya sang Taala Farm bwas, agud diskusyunan ang reklamo tuhoy sa naga-alisngaw nga baho sang iti sang manok.
Sa interview sang Bombo Radyo Bacolod kay Murcia Mayor Gerry Rojas, ang tentative schedule sang meeting nga patigayunon sa Cansilayan National High School, ang himuon alas-10:00 bwas sa aga.
Magatambong diri ang tag-iya sang Taala Farm kasubong man ang mga opisyales sang Barangay kag mga ahensya sang gobyerno nga involved kaangay sa Department of Environmet and Natural Resources (DENR).
Sa inisyal nga paghinun-anon kay Mr. Taala, ini ang willing man nga magkoordinar agud masolusyonan ang problema.
Willing man ini nga panubuon ang produksyon agud mapahagan-hagan ang baho.
Madumduman nga sadto ginalubong sang Taala Farm ang mga higko, apang bangod 10 ka trucks kada adlaw ang kinahanglan idispose, nagpaandam ang DENR nga ini ang indi pwede nga ilubong lamang sa baylo dapat iproseso agud mangin organic fertilizer.
Nagapati si Rojas nga maayo ang tinutuyo ni Mr Taala sa pagproseso sang mga iti. apang kulang lamang sa mga safeguards.
Isa sa mga nakita nga temporaryo nga solusyon amo ang pagdoble sang enzyme nga ginagamit agud makuha ang baho sang mga iti.
Aminado ang alkalde nga apisar nagtanom sang kapin 300 ka mga Rubber Tree ang Taala Farm, ini ang pila pa ka tuig antes makaserbe nga wind barrier kag makapugong sang paglapta sang baho.
Aminado si Rojas nga madugay na ang problema, apang pasalig sini sa mga residente nga tinguhaan nila nga masolusyunan ang problema.
Sa baylo, ginapanawagan sini sa mga apektado nga sila ang sarang gid makapartisipar sa patigayunon nga meeting bwas, Abril 11.
