Liwat nga ginpahanumdom sang alkalde sa ciudad sang Bacolod sa mga empleyado sang City Government nga ginadumilian ang mga ini sa pagproseso sang dokumento sang iban nga persona.
Sa interview sang Bombo Radyo Bacolod kay Secretary to the Mayor Atty. Marty Go, antes paman magfile sang leave si Bacolod City Mayor Alfredo “Albee” Benitez ini ang may nauna na nga memorandum tuhoy sa pagdumili.
Apang bangod sa duha ka kaso sang fixer gikan sa Bacolod City Environment and Natural Resources Office kag City Licensing Office, ini ang liwat nga ginreiterate sang alkalde.
Suno kay Go, tanan nga empleyado, regular man, job order ukon contract of service employees ang ginadumilian nga magproseso sang business permit kag iban pa nga mga dokumento nga indi ila.
Paathag sini nga okay lamang ang mag-assist apang ang magakapot sang dokumento kag magapila amo ang mismo nga kliyente.
Ini bangod nga madamo sang hitabo kun sa diin paagi sa mga empleyado, gina-una proseso ang transaksyon sang kliyente, ukon ang empleyado mismo ang nagaproseso sini.
Pinaagi sa memorandum, ma-untat na ang paghatag sang pabor kabaylo sang kwarta.
