Nagapanawagan ang alkalde sang banwa sang La Castellana sa Offiice of the President nga mahatagan man sila sang atensyon sa karun nga halos wala na sila sang pondo nga maggasto para sa mga evacuees sang paglupok sang bulkan Kanlaon.
Sa interview sang Bombo Radyo Bacolod kay La Castellana Mayor Rhumyla Nicor Mangilimutan, naintindihan sini ang sitwasyon sang mga evacuees apang indi man sini mahimo nga indi pagsundon ang guidelines kag advisory nga ginahatag sa ila.
Suno diri, nabudlayan na gid ang Local Government Unit sa pagpakaon sa linibo ka mga evacuees kag halos wala na gid sila sang pondo nga sa karun mahimo pa nga maapektohan ang pondo sang iban nga programa sang banwa.
Suno pa diri, kun mabug-at na para sa ila ang pagpakaon sa mga evacuees, mas mabug-at pa gid ang balayran nila sa kuryente kag sa tubig kada bulan dugang pa nga kun may yara sang bawian sang kabuhi sa sulod sang evacuation center, sila pa ang maggasto sa tanan nga pagpalubong.
Nagapanawagan si Mangilimutan kay president Ferdinand ‘Bong Bong’ Marcos nga hatagan man sila sang atensyon sa karun nga dako ang gina-atubang nila nga kalamidad sa paglupok sang bulkan Kanlaon.
