Nasubuan man ang alkalde sang ciudad sang Silay nga nalakip ang renowned neurosurgeon nga si Dr. James Goodrich, ang doktor nga nagbulag sa conjoined twins nga sanday Carl kag Clarence Aguirre, sa mga Americano nga napatay bangud sa coronavirus disease.
Sa interview sang Bombo Radyo kay Mayor Mark Golez, naistorya niya sang personal si Dr. Goodrich sang September 29, 2004 bangud siya ang nagpresentar sang resolusyon nga ginpasar sang Sangguniang Panlungsod sang Silay nga nagahatag sang pasidungog sa neurosurgeon sa madinalag-on nga operasyon sa kapid nga Aguirre.
Sang amo nga tion, konsehal sang ciudad si Golez kag natabuan nga nagbakasyon ini sa New York gani gindala niya ang resolusyon kag gindul-ong kay Dr. Goodrich sa Montefiore Medical Center.
Gindumdom sang alkalde si Goodrich bilang mapainubuson kag may sense of humor bangud naglahog pa ini kun may dala nga paho ang konsehal.
Gindayaw man ini sang konsehal bangud gilayon ini nga nagpasugot sang nagset siya sang appointment.
Suno sa alkalde, nalipay ang doktor sa madinalag-on nga operasyon sa Aguirre conjoined twins bangud ini ang labing una nga kaso nga wala sang naencounter nga problema sa ila kag nakibot man ini nga ginhatagan siya sang Sangguniang Panlungsod sang pagkilala.
Ang kapid ang wala na ginpapauli sa Negros Occidental bangud lifetime ang monitoring sa ila bilang kabahin sang science sa successful operation rason nga didto naman nagaistar ang ila iloy nga si Arlene.
Suno sa alkalde, nasubuan ini nga nagtaliwan ang nangin instrumento sang Ginuo sa maayo na subong nga pagpangabuhi sang mga Aguirre.
