Nagpagwa sang executive order 2020-36 series of 2020 ang alkalde sang Victorias City nga nagadumili sa pagpasulod sang mga pumuluyo nga wala man sang importante nga tinutuyo sa ciudad.
Sa interview sang Bombo Radyo kay Mayor Frederick Wantan Palanca, ginpahayag sini nga epektibo subong nga adlaw, Agosto 26 tubtob Agosto 31 ang nasambit nga executive order.
![](https://img.bomboradyo.com/bacolod/2020/04/VICTORIAS.jpg)
Suno kay Palanca, ini agud masiguro nga wala sang may makasulod sa ciudad ukon makapauli sang timprano ang mga residente antes ang patigayunon nga mass testing sa Bacolod, Silay, Talisay, Bago kag Murcia sa Agosto 28 tubtob Agosto 31.
Suno sa alkalde, kun essential worker sang ciudad ang isa ka persona, kinahanglan nga may ipakita ini nga identification card ukon employment certificate.
Kun authorized person outside residence (APOR) naman, kinahanglan nga magpresentar sang ID, valid nga RT-PCR certificate nga nagapakita nga negatibo ini sa virus kag certification nga nagapamatuod nga indi ini PUI ukon PUM.
Wala naman sang problema suno kay Palanca ang paglabay sang mga cargos kag passenger buses sa ciudad.
Suno diri, anom ka adlaw man lang epektibo ang border control gani nagapanawagan ini nga kun wala man lang sang importante nga transaction, likawan anay ang pagpadulong sa ciudad sang Victorias.