Ginpahayag sang alkalde sang ciudad sang Victorias nga naga-ugyon ini sa pag-resign sang bise-alkalde kag mga konsehal sang ciudad sa Partido Demokratiko Pilipino (PDP).
Sa interview sang Bombo Radyo kay Victorias City Mayor Javi Benitez, nag-resign ang mga miyembro bangod nga wala sang konsultasyon nagikan sa ila nga mahimo nga si former Victorias City Mayor Wantan Palanca ang iduso sang PDP nga magpapili bilang gobernador.
Suno diri, suportado sini ang pag-resign nila bangod nga ang governance style kag mga desisyon ni Palanca sang ini ang nagapungko pa sa pwesto ang wala nagasanto sa dereksyon sa karun sang ciudad sang Victorias.
Gin-athag man sang alkalde nga suportahan sini si Negros Occidental Governor Eugenio Jose Bong Lacson sa pagpapili sini sa 2025 midterm election para sa katapusan sang iya termino.
Apang, sa bahin naman sa naglapta nga esturya nga siya ang magapapili bilang gobernador, suno diri wala ini sang kamatuoran apang bukas ini sa mga palaabuton bangod nga timprano pa para sa iya nga magbuya sang pahayag basta sa karun, suportahan sini si Lacson para sa 2025 election.
