Napatay ang isa ka gina-alegar katapo sang New People’s Army sa apat ka asod-asod nga engkwentro sa tunga sang rebelde kag militar sa Barangay Humay humay, Guihulngan City, Negros Oriental kahapon.
Ang engkwentro ang sa tunga sang 62nd Infantry Battalion sang Philippine Army batok sa ginabanta siyam ka remnants sang Central Negros 1 sang NPA.
Sa interview sang Bombo Radyo Bacolod kay Col. Erwin Rommel Lamzon, public affairs office chief sang 3rd Infantry Division, ang una nga engkwentro ang nagluntad alas-6:07 sang aga, nasundan sang alas-6:51 sang aga, alas-12:20 sang udto kag ala-1:45 sang hapon.
Ang engkwentro ang nagluntad samtang nagapatrolya ang mga militar, matapos nga naglunsyar ang NPA sang M203 grenade.
Isa ka Corporal naman ang naigo sang shrapnel gikan sa granada, samtang ang una nga engkwentro ang naglawig sang lima ka minutos.
Narecover sa encounter site ang duha ka high powered firearms nga ginalakipan sang M16 kag M4 rifle, iban pa nga war materials kag mga personal nga pagkabutang.
Narecover naman ang bangkay sang ginkilala nga si Tony Pahayahay Alyas Aldrin ukon Ridol, miyembro sang Squad 2 sang Sentro de Grabidad sang Central Negros 1.
Ang pilason nga militar ang napanaog naman agud mahatagan sang nagakaigo nga pagbulong.
Suno kay Lamzon, wala nakabahin ang 62nd IB sa nagligad nga engkwentro sa Barangay Tapi, Kabankalan City.
Apang bangod katupad lamang nga lugar, mahimo nga ang mga nagpinalagyo nga rebelde ang nagtabok sa Guihulngan City.
