Patay ang isa ka amay matapos gintiro sang riding-in-tandem suspects sa ciudad sang Talisay kaina sang aga.
Ang biktima nga si Ronald Nicavera, 38-anyos, ang gintiro sang mga suspetsado nga nagasakay sa motorsiklo sa Hacienda Gloria, Barangay Concepcion, Talisay City pasado alas-7:00 sang aga.
Suno sa imbestigador sang Talisay Police Station nga si Police Senior Master Sergeant Pastor Silajis, si Nicavera ang nagdul-ong sang iya anak sa Hilario National High School kag pagbalik sini sa ila balay, siya ang gintiro sang mga suspetsado sa Bangga Cubay.
Indi magnubo sa apat ka mga lupok ang nabatian sang mga residente sa lugar antes nagpalayo ang mga suspetsado padulong sa norte nga direksyon.
Antes ang krimen, madugay ang paghulat sang mga suspetsado sa biktima.
Suno sa tag-iya sang tiange malapit sa crime scene nga si Emma, pasado alas-6:00 pa lang sang nagbakal sang sigarilyo ang angkas sa motorsiklo samtang nagahulat naman sa unhan ang driver.
Suno kay Emma, ang driver man ang trigger man apang ila gid ginsiguro nga patay na si Nicavera antes ginbayaan.
Indi naman kilala ni Emma ang mga suspetsado bangud may mask ang trigger man kag bag-uhanon sa lugar ang angkas.
Suno sa anak sang biktima nga si Argie Nicavera, wala sila sang ideya sa motibo sa pagpatay sa iya amay bangud wala man ini sang kontra sa Barangay Concepcion.
Apang ginalantaw man niya nga mahimo may kaangtanan sa kamatayon sang iya tiyo nga si Ronilo Nicavera ang krimen.
Madumduman nga si Ronilo Nicavera Jr. ang ginpatay samtang yara sa jeep sa Purok Lampirong, Barangay 2, Bacolod City sang tinalikdan nga bulan.
Suno kay Police Senior Master Sergeant Pastor Silajis, ginatumod pa kun ano ang motibo sa krimen.
Si Nicavera ang wala sang drugs watchlist sang Barangay Concepcion kag Talisay Police Station.
