Patay ang amay nga gina-alegar nagasuprer sang nervous breakdown matapos mag-utas sang kabuhi kasunod sang paglabo-labo sa iya live-in partner kag apat nila ka menor de edad nga kabataan sa Purok Ibos, Barangay Tapi, Kabankalan City alas-6:30 kahapon sang hapon.
Ang amay ang ginkilala nga si Eumil Francisco alias Toto, 36 anyos samtang ang live in partner sini nga yara sa karun sa ospital ang ginkilala nga si Rubelyn Bulandres, 36 anyos.
Sila ang may pito ka kabataan, ang 16 kag 19 anyos ang yara sa Manila kag banwa sang Cauayan, samtang ang lima ka menor de edad nga kabataan ang kaupod nila sa balay.
Sa interview sang Bombo Radyo Bacolod kay Police Capt. Sammy Gasataya, deputy chief of police sang Kabankalan City Police Station, samtang nagapreparar sang panyapon ang iloy kag mga kabataan, wala sang ka rasun-rasun nga ginlabo sang amay ang iya pamilya gamit ang binangon.
Ang anom kag siyam ka tuig nga bata sang mga ini ang gindala na sa Corazon Locsin Montelibano Memorial Regional Hospital matapos makaangkon sang samad sa likod kag ulo.
Ang iloy kag tatlo ka tuig nga bata ang yara naman sa Kabankalan District Hospital samtang nakagwa na sa ospital ang isa ka tuig nga baby.
Samtang wala naman nasamaran ang 13 anyos nga bata nga amo ang nakakita sa pag-utas sang amay sang iya kabuhi pinaagi sa pagbuno sang kaugalingon.
Sa imbestigasyon sang kapulisan, masobra duha ka tuig na nga nagasuprer sang nervous breakdown ang mangunguma nga amay.
