Kaangay nga ginakumos ang dughan sang isa ka amay matapos nga makit-an ang natabo sa iya tatlo ka kabataan nga ginlampusan sang bato, kun sa diin isa ang napatay sa Hacienda Badiang, Barangay E. Lopez, Silay City, Negros Occidental sang Sabado, Pebrero 7, 2026.
Sa interview sang Bombo Radyo Bacolod kay Edmund Bornales, semanahan lamang ang pagpauli sini sa ila nga balay bangud siya ang nagatrabaho bilang inkargado sa Bacolod City.
Suno kay Bornales, ang mga kabataan lamang ang bilin sa balay bangud ang ila iloy ang nagtrabaho man sa luwas sang pungsod.
Suno sa amay wala sini ginalauman ang matabo sa iya nga mga bata bangud kun siya ang magpauli kada Biyernes ukon Sabado, maayo man ang kahimtangan sang mga kabataan.
Suno sa amay, sa pagpauli siya ang masami nga nagadegamo kag sila ang ululupod nga nagakaon.
Wala man ini makakita sang mga barkada sang iya mga kabataan, bangud wala man sang may nagakadto sa ila balay kun ini ang magpauli.
Wala man sang kontra ang amay gani blangko ini sa kun sin-o ang may kahimuan sang krimen.
Suno pa diri nagatrabaho ini bilang inkargado sa sulod na sang masobra 20 ka tuig.
Madumduman nga ang tatlo ka mga bata ang gin-alegar nga ginlampusan sang bato sang wala pa matumod nga suspetsado.
Napatay ang siyam ka tuig nga bata nga babayi bangud sa pilas sa ulo samtang padayun pa nga ginabulong sa ospital ang 14 anyos nga babayi kag apat ka tuig nga bata nga lalaki.
