BACOLOD CITY – Ginapabugal sang 16-anyos nga Filipina-American contestant sa The Voice US ang pag-angkon sini sang dugo nga Pinoy.
Sa exclusive interview sang Bombo Radyo Bacolod kay Anatalia dela Paz Villaranda, ginpahayag sini nga tuman niya nga ginapabugal ang pagka-Pinay sini kag ‘proud’ man siya nga ipakita ang iya nga talento sa bug-os nga Amerika pinaagi sang ‘The Voice’.
Dugang pa sini, bilang Pinay, iya ginahatag ang bug-os niya nga masarangan sa kada performance, ilabi na kag mainit ang suporta sang iya mga kasimanwa diri sa Pilipinas, kag iya man ini lubos nga ginapasalamatan.
Nagalatay gid sa mga ugat sini ang pagka-Pinoy bangud ang iya paborito nga pagkaon ang Pinoy gid kag ini amo ang ‘sinigang nga baboy’.
Samtang, ginpahayag ni Anatalia nga madamo ini sang nahibaluan nga ambahanon nga Pinoy bisan pa nga wala niya ini tuman nga nahangpan kaangay na lamang sang kanta nga “Chinito” ni Yeng Constantino kag game man ini sa paghatag sang sample.
