5 ang ginhatag nga ratings ni former Negros Occidental Governor Rafael ‘Lito’ Coscolluela sa scale nga 1 to 10 para sa State of the Nation Address ni President Ferdinand ‘Bongbong’ Marcos Jr.
Sa interview sang Bombo Radyo Bacolod kay Coscolluela, 8 ang ma-rate sini sa paghatag sang accomplishment report sa kada ahensya bangud halos kada sektor ang natalakay.
Apang bangud sa kadamuon sang topiko hapaw lamang kag indi detalyado ang mga plano.
Suno sa anay gobernador, kuntani sa SONA, gintalakay kun ano ang nangin problema sang nakaligad nga tuig, ang nangin solusyon, kag kun ano pa ang nabilin nga problema nga solbaron.
Apang kaangay nga nakaandan na nga sa kada SONA, nangin padayaw na lamang sang ila mga accomplishment.
Pahayag sini nga si Marcos ang nagahatag sang mga plano nga himuon apang wala man ginalatag kun paano ini ipatuman kag kun diin magakuha sang budget.
Isa man sa karun sa ginapangita sang publiko ang ginmensyonar sini nga madamo nga natukod nga flood control projects karun nga tuman ang pagbinaha sa nagkalain-lain nga bahin sang pungsod.
Wala man sini mamitlang ang papel sang mga pumuluyo, nga kuntani sa SONA, iya nga ipahanumdom ang importansya sang pagbinuligay sa pagsolbar sang mga problema.
Pahanumdom sang anay gobernador nga ang civil society ang may dako nga bahin sa paglukdo sang problema sang pungsod, gani ang mga ini ang dapat kilalahon man sabaylo nga lunsay mga personal accomplishments na lamang ang ginapabugal.
Sa pihak nga bahin, apisar nga madamo sang topiko nga gintalakay ang Presidente, madamo man ini sang wala nahatagan sang atensyon kaangay sang matabo sa kaso sang International Criminal Court (ICC) batok kay former President Rodrigo Duterte, ang ginduso nga Charter Change, demand sa pagbalik sang P90 billion nga nadula nga pondo sang PhilHealth kag solusyon sa education crisis.
