Liwat nga nagbalik sa prisuhan ang anay priso matapos nga madakpan sa drug buybust operation nga ginpatigayon sa Purok Mabinuligon, Barangay 19, Bacolod City sang Enero 6 sang gab-i.
Ginkilala ang naaresto kay Arnord Galleto, 50 anyos, kasado, wala sang trabaho kag residente sang Purok Mabinuligon Barangay 19, Bacolod City.
Sa interview sang Bombo Radyo Bacolod kay Police Major Elmer Bonilla, station commander sang Bacolod City Police Station 4, narecover sa subject person ang kapin 6 gramos nga suspected shabu kag nagabalor sang P40,000.
Suno kay Bonilla, nakahunong na si Galleto sa custodial facility sang Bacolod Police Station 4.
Suno diri, may ginamuno nga source ang subject person nga ginkuhaan sini sang supply sang illegal nga druga kun sa diin madason naman nga target sang Bacolod Police Station 4.
Ang nadakpan ang nakamuno man sa mga kapulisan nga anay ini nga napriso bangud ginapahayag nga may napatay apang ivalidate pa ini sa record sa data base.
Mahimo nakagwa ini matapos nga naserbehan na ang sentesya sini.
Napasakaan naman sang complaint si Galleto nga paglapas sa Section 5 kag 11 sang RA 9165 ukon Comprehensive Dangerous Drugs Act of 2002.
