Anom ka gina-alegar katapo sang New People’s Army (NPA) ang napatay sa engkwentro batok sa militar sa Barangay Gatuslao, Candoni, Negros Occidental alas-3:40 kaina sang kaagahon.
Sa interview sang Bombo Radyo Bacolod kay 302nd Infantry Brigade Commander Brig. Gen. Joey Escanillas, nakabatun sila sang report gikan sa pumuluyo nga may mga armado nga grupo nga nagalibot sa lugar.
Ang lugar ang kapin tatlo tubtob lima ka kilometro lamang gikan sa ila military detatchment kag may-ara man sang malapit nga Palm Oil Plantation sa area.
Bangod indi mapaktan kun ano ang plano sang mga armado nga grupo, ini ang gilayon gin-operar sang 47th kag 15th Infantry Battalion sang Philippine Army kag didto na nagluntad ang engkwentro.
Suno kay Escanillas, naglawig sang 40 tubtob 50 minutos ang pagbayluhanay sang lupok nga nagresulta sa pagkamatay sang anom ka gina-alegar NPA members.
Sila ang nakarecover naman sang walo ka high powered firearms kag sa karun padayun ang pagpatigayon sang manhunt kag clearing operations.
Ang militar ang nakig-angot naman sa Philippine National Police para sa imbestigasyon kag agud matumod ang identity sang mga napatay.
Panawagan ni Escanillas sa mga nabilin pa nga miyembro nga mas maayo nga magasulod sa peacefull negotiotation ukon magbalik na sa sabak sang gobyerno, agud malikawan ang kaangay nga hitabo, nga may-ara sang madulaan sang kabuhi.
