Narescue sang katapo sang Philippine Coast Guard ang anom ka mga mangingisda nga sakay sa motorbanca nga nagkulob sa baybayon nga sakop sang Silay City kahapon sang aga, Mayo 12.
Ang anum ka mga narescue ang ginkilala nga sanday Joan Infante, 37-anyos; Arnel Sevilla, 25-anyos; Jondle Sevilla; 24-anyos; Liberato Sevilla, 58-ayos; Ricky Sevilla, 30-anyos; Elmer Tiongzon, 39-anyos; lunsay mga residente sang Catabla Baybay, Barangay Zone 3, ciudad sang Talisay, Negros Occidental.
Sa interview sang Bombo Radyo kay Coast Guard Commander Paterno Belarmino sang Coast Guard Station Northern Negros Occidental, may yara sang nagtawag sa ila nga radyo nga may nagkapan nga motorbanca matapos nga malabayan sang motor tanker.
Gilayon nga nagdeploy sang personnel sini ang Philippine Coast Guard kag nagpatigayon sang rescue operation nga ginpangunahan sang ni Auxilliary Commander Ricky Malayo.
Naggamit man sila sang floating asset ukon ang tug boat para sa pagrescue sa anum ka mga mangingisda.
Pahanumdom ni Belarmino sa mga mangingisda nga pahibaluon ang mga otoridad sa tion nga magpalawod ang mga ini.
