Apat ka mga persona ang nadakop sa ginpatigayon nga drug buybust operation sa Purok Narra, Barangay Handumanan, Bacolod City kaina ala-1:40 sang kaagahon.
Suno kay City Drug Enforcement Unit (CDEU) Head P/Lt Joven Mogato, ang mga suspetsado ang ginkilala kanday Joseph Espiritu alyas Toto Joseph, 32 anyos, nga amo ang subject person; Cesar Espiritu alyas Boknoy, 33 anyos, lunsay mga residente sa nasambit nga lugar; Rio John Diwatin alyas Jojo, 32 anyos, residente sa Purok Zone 6; kag Rose Anne Bachoco alyas Ann, 28 anyos, residente sa Purok San Antonio sa kaangay nga Barangay.
Narecover sa mga ini ang 11 tanan ka sachet sang suspected shabu, P100 nga marked money, P200 nga cash proceeds, improvised toother kag sling bag.
Ang narecover nga suspected shabu ang ginabanta nagabug-at sang 25 gramos kag may standard drug price nga P170,000.
Suno kay Mogato, tatlo ka adlaw ang ginpatigayon nila nga monitoring tubtob sa mapatigayon ang buybust operation.
Ginkumpirmar man sini nga mag-utod ang subject nga si Joseph kag si Cesar Espiritu.
Samtang apisar nga pamilyado na si Joseph, kag may duha ka kabataan, apang indi sini kaupod, ginapahayag nga nobya man sini ang kaupod nga nadakop nga si Bachoco.
Positibo man si Mogato nga nagagamit sang ginadumilian nga droga ang babayi bangod nakarecover sila mismo sang suspected shabu sa paghinakop sini.
Ang mga suspetsado ang nakahunong na sa kustodiya sang Bacolod Police Station 10 kag natalana magpangatubang sang nagakaigo nga kaso.
