Ginrelieve na sang Bacolod City Police Office (BCPO) sa ila tagsa ka opisina ang apat ka mga Police Non-Commissioned Officers nga imbulbado sa recruitment scam sa banwa sang La Castellana, nga nagatanyag sa pagsulod sa Philippine National Police (PNP) kabaylo sang kwarta.
Madumduman nga nakasuhan na bangod nasambitan nga PNP recruitment scam sanday Mary Jun Delos Santos, nga recruiter kag La Castellana Municipal Councilor Donato ‘Natnat’ Dumaguit nga amo ang naga-atubang sa mga biktima kag nagabatun sang kwarta nga balor P250,000 pasaka.
Apang, sa dalayon nga imbestigasyon naggwa naman ang pangalan sang apat ka Police Non-Commissioned Officers kag isa ka non-uniformed personnel.
Sa interview sang Bombo Radyo Bacolod kay Police Lt. Col. Ronnie Brillo, ang commander sang Bacolod City Mobile Force Company, gilayon nga ginpatawag ni BCPO Director Police Col. Noel Aliño ang tatlo ka police personnel nga naka-assign sa BCPO Headquarters kag isa nga assigned sa Bacolod Police Station 4, ginrelieve, kag ginsaylo sa Office of the City Administrator.
Ini agud sila ang indi makabalabag sa ginapatigayon nga imbestigasyon.
Magluwas diri, sila ang gindis-armahan man kag ang ila nga mga armas ang temporaryo nga gindeposit sa firearms supply sang BCPO.
Nagtukod naman sang Special Investigation Team ang BCPO bilang suporta sa fact-finding team sang Negros Occidental Provincial Internal Affairs Service.
Nagapati si Brillo, nga sa ila nga kamot, madasig lamang maresolbar ang kaso, apang agud malikawan ang pagpinsar nga may biases, magakoordinar sila sa imbestigasyon sang PIAS.
Apang paathag sini nga wala sang actual complainant sa mga Police personnels kag sila ang naulamid lamang sa imbestigasyon matapos nga namensyonar ang ila nga mga pangalan sa social media.
Suno sa ginsumiter sang mga imbulbado nga eksplinasyon, sila ang wala sang nabatun bisan singko sa gina-alegar PNP recruitment scam.
Nahibaluan nga ginpahayag sang PIAS nga ang mga kapulisan ang nagapatigayon sang Squad Weekly Interactive Meeting kag didto sila nagakitaay nanday Delos Santos kag Dumaguit.
Ang mga pulis ang ginpakilala naman sa mga biktima sang konsehal, gani sila ang nagtanom sang pagsalig.
Nahibaluan nga nagdangat na sa P17 million ang nataban gikan sa mga biktima sang PNP recruitment scam.
Sa tion nga mapamatud-an ang involvement sang mga kapulisan, ini ang mahulog sa kaso nga grave misconduct nga may penalidad nga dismissal sa serbisyo, demotion ukon 90-days suspension.
Apang bangod dako nga kaso ang large scale estafa, ini ang mahulog na sa maximum penalty nga dismissal sa serbisyo.
