BACOLOD CITY – Nagpalab-ot sang pagpanamyaw ang Apostolic Nuncio gikan sa Vatican sa gin-ordinahan na nga Obispo sang Diocese of Kabankalan nga si Bishop Louie Galbines.
Ang mensahe ni Apostolic Nuncio Bishop Gabriel Cacha nga nasulat sa Latin kag gin-translate sa English ang ginbasa ni Monsignor Gabriel Viola , Secretary of Papal Nuncio to the Philippines.
Sa iya mensahe, gintamyaw sini ang pumuluyo sang Dioces of Bacolod kag Kabankalan kag ginapasiguro ang spiritual closeness sang Santo Papa sa tanan.
Gin paalab-ot naman sini kay Bishop Galbines nga nagapasalamat si Pope Francis sa pagbaton sini sang dako nga responsibilidad nga mangin tagpamuno sang Diocese sang Kabankalan.
Ila ginapangamuyuan naga sa iya bag-o nga katungdanan hatagan ini sang Mahal nga Diyos sang maayo nga panglawasan kag malawig nga kabuhi.
Samtang ginpasalamatan man sini si Bishop Patricio Buzon sang Diocese of Bacolod nga sadto anay tagpamuno man sang Diocese of Kabankalan.
Samtang sa malip-ot nga mensahe ni Bishop Galbines matapos ang iya Episcopal Ordination kahapon nagahingyo ini sang pagpangamuyo bangud nga indi ini sigurado sa matabo apang sigurado ini nga ang Ginoo yara lang pirmi.
Ginpasalamatan man sini ang tanan nga nagbulig sa iya nga malab-ot ang bag-o sini nga katungdanan sa Simbahahan.
Subong nga adlaw iga-instular na si Bishop Galbines kun sa diin magapatigayon sang caravan gikan sa Sacred Heart Seminary sa Bacolod padulong sa St. Francis Javier Cathedral sa Kabankalan kun sa diin patigayunon ang Canonical Installation.
