BACOLOD CITY — Nagapabor si Third Infantry Division, Philippine Army Commander Major General Jon Aying nga hatagan sang extension ang martial law sa Mindanao.
Sa interview sang Bombo Radyo Bacolod, ginpahayag ni Aying nga bilang isa ka strategic planner, nakahibalo ini nga kulang pa ang nalab-utan sang batas militar nga ginpatuman humalin sadtong Mayo 23 agud malubad ang problema sa insurhensiya kag terorismo sa Mindanao.
Suno kay Major General Aying, kun siya ang pahimuon sang plano sa pagbangon sang Mindanao, una sini nga kaayuhon ang stability antes magpatuman sang anuman nga development sa rehiyon sa aspeto nga social, political kag economic.
Sa pagbanta sini, napulo tubtob 12 katuig pa ang kinahanglan para sa training, preparasyon tubtob sa transition period antes mapalig-on ang pang-gobyerno sa Mindanao, ilabi na sa lugar sang mga tribu sang mga Muslim.
Suno sa 3rd ID commander, kun hinali nga batakon ang Mindanao, liwat naman magaluntad ang kinagamo kag mabudlayan na ang pag-angkon sang kontrol.
Panindugan ni Major General Aying, dapat palawigon pa ang martial law apang dapat masiguro nga masaligan ang mga personalidad nga magatindog nga lider sa Mindanao agud masiguro nga indi maabusuhan ang mga poder nga ginahatag sang military rule.
Pabor man si Negros Occidental Governor Alfredo Marañon Jr. sa ginaduso nga extension ukon pagpalawig sang martial law sa Mindanao.
Ini ang kasunod sang ginahingyo ni Presidente Rodrigo Duterte nga palawigon tubtub sa Disyembre 31 subong nga tuig ang batas militar sa Mindanao bangud wala pa natapos ang kalakasan sang Maute terror group nga inspired sang ISIS.
Suno kay Marañon, kinahanglanon sang amo nga rehiyon ang martial law bangud padayon gihapon ang kinagamo diri.
Panindugan sang gobernador, indi dapat pagkwestyunon tuhoy sa human rights violations ang mga suldado bangud wala man sang report nga may ginlapas sila nga tawhanon nga kinamatarong.
Kun wala nagarespeto sa human rights ang tropa sang gobyerno suno kay Marañon, kuntani napudpod na ang Marawi bangud sa patarasak nga pagpangbomba kag madamo ang mga sibilyan nga collateral damage.
Sa baylo suno sa opisyal, ang mga miyembro sang Maute ang may paglapas bangud sila ang nagapamugot sang ulo sang mga residente nga ginahalungan sang mga suldado nga indi mapatay.
Apang nagapangamuyo naman ang opisyal nga indi na magdugay ang Marawi crisis.
