Hambal gani sang mga nauna sa atun sa duyan, wala sang sekreto nga matago miyentras tanto.
Kaangay lamang sa natabo sa isa ka lalaki sa Italya kun sa diin, nadakpan ini sang iya asawa nga nagapanglu-ib pinaagi sa promotional video sang isa ka restaurant nga gin-post sa Tiktok.
Nagpasaka sang kaso ang 42 anyos nga lalaki batok sa isa ka restaurant matapos gin-feature ini sa nasambit nga promotional video nga wala sang iya pahanugot. Mas kumplikado pa ang kaso bangud nakita sang asawa sini ang video nga nagresulta sa pagkaguba sang ila pag-asawahay.
Sa video, makita ang lalaki upod sa iban nga babayi.
Ginrason naman sang lalaki nga business meeting lang ang natabo. Bangud sa kahuya, ginbulagan siya sang iya asawa kag ginpalayas sa ila balay.
Sang nahibaluan niya nga nadakpan siya sang iya asawa pinaagi sa promotional video, nagpasaka sia sang kaso batuk sa restaurant.
Gintiglawas sang Italian consumer protection association nga Codacons ang lalaki sa iya kaso.
Gin-insister sini nga ginlapas sang restaurant ang iya privacy kag nagapangayo sang bayad sa natuga nga damages.
