Desidido nga magpasaka sang kaso ang asawa sang isa ka priso matapos gina-alegar nga ginkastigo sang pulis sa Bacolod Police Station 9 ang iya nga bana.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, wala sini ginatolerar ang kaangay nga buluhaton.
Suno diri, ang kapulisan ang dapat magsunod sa guidelines sang Philippine National Police kag derektiba sang ciudad nga nagakondenar sa pagpanakit sang kapulisan sa detainees.
Masami man sini nga ginapahanumdom sa conferences sang estasyon ang mga kapulisan ang pagsulundan kag ini ang ginatudlo man sa training gani nakahibalo na ang mga kapulisan nga indi pwede ang magpanakit sang priso.
Suno kay Ofalia, matapos mabatun ang report sang asawa, gilayon man sini nga ginpa-eksplikar ang team kag ang ginareklamo nga pulis, kag ginahulat pa sa karun ang sabat sang mga ini.
Sa impormasyon sang Bombo News Team, ang asawa ang nagdangop na kay Bacolod City Police Office Director Police Col Joeresty Coronica bangod sa gina-alegar nakabatun sang pagpamahog nga ubuson ang ila pamilya.
Dugang pa sini nga madamo sang lagob ang iya nga bana kag nadulaan sang gana sa pagkaon sumugod sang ginkastigo.
Padayun pa sa karun ang pagserbisyo sang pulis samtang ang Person Deprived of Liberty ang nasaylo na sa Bureau of Jail Management and Penology.
Suno kay Ofalia, tsekyaron man nila ang sitwasyon sang nasambitan nga priso bangod sa pagtransfer sa BJMP ini ang ginapaidalom man sa medical checkup gani matumod kun ini ang nakastiguhan gid man.
Panawagan sini sa kapulisan nga dapat may public accountability kag transparency sa pagserbisyo.
Ginahulat sa karun ang formal complaint kag ini ang pagasabton sang police personnel.
