BACOLOD CITY — Nagapreparar na si DENR Region 6 Assistant Regional Director Levino Duran agud magpungko nga regional director sang DENR Negros Island Region.
Sa interview sang Bombo Radyo, ginpahayag ni Duran nga napahibalo na ini nga may yara sang special order nga nagadesignar sa iya bilang DENR-NIR director apang wala pa niya ini mabaton tubtob sa karon.
Apang sa pihak nga wala pa sang pormalidad, ginmanduan na ini ni DENR Region 6 Director Jim Sampulna nga magpreparar kag tapuson na ang tanan nga ulobrahon kag assignments sini sa Iloilo.
Suno kay Duran, kun mabaton na sini ang mandu, magapatigayon sang turnover ceremony sa tunga nila ni Outgoing DENR Director Al Orolfo sa maabot nga Mayo 5, Byernes nga adlaw.
Si Duran ang nagpungko nga Provincial Environment and Natural Resources Officer (PENRO) sang Negros Occidental humalin 2003 tubtob 2009 antes ini gindestino sa DENR Region 6.
