Hiligut-anon sa pamilya, konplikto sa duta kag propedad ang isa sa mga motibo nga ginalantaw sang kapulisan tuhoy sa pagluthang patay sa isa ka negosyante sa intersection sang BS Aquino Drive kag Lacson Street sa Barangay 5, Bacolod City, Martes sang hapon.
Madumduman nga kahapon ginluthang sang duha ka mga motoriding suspects ang ginasakyan nga Nissan Patrol ni Jeffrey Keng Seng, single, 40 anyos kag residente sang Gatuslao Street, Corner 27th Street, Brgy. 1, Bacolod City.
Sa interview sang Bombo Radyo kay Police Captain Paul Vincent Pendon, station commander sang Bacolod Police Station 2, ang mga suspetsado ang nagasakay sa duha ka separado nga motorsiko kag nagasuksok snag hoodie nga itom.
Santo sa imbestigasyon sang kapulisan, nagikan sa likod sang salakyan ang trajectory sang bala kag sang natiruhan si Keng Seng, gilayon ini nga nagpalagyo sa area apang nadulaan na sang pwersa kag animo kag nagdiretso ang ginasakyan sini sa bahin sang Barangay 3.
May apat ini ka igo sang bala samtang may nakita naman nga fired cartridges sa tunga sang dalan kun diin ini ginluthang.
Sa karun wala pa nahibaluan kun ano nga calibre sang armas luthang ang gingamit.
Suno kay Pendon, isa sa mga motibo nga ila ginalantaw amu ang hiligut-anon sa pamilya bangud may mga daan nga blotter reports nga narekord sa Bacolod Police Station 3.
Santo sa reports, si Jeffrey ang nagpablotter in behalf sa iya amay nga si John Keng Seng agud ireklamo ang hinablos sang iya amay bangud sa konplikto sa propedad.
Ginalantaw man nga posible may kaangtanan sa negosyo ang motibo sang krimen.
Ang pamilya ni Keng Seng ang nagapanag-iya sang isa ka shopping mall sa ciudad.
Suno sa station commander, ila pamangkuton ang mga himata sang biktima kun diin sila sang natabo ang krimen kag padalman pa ang imbestigasyon.
Apisar nga may naestablish na sila nga inisyal nga motibo sang krimen, ila gihapon padalman ang imbestigasyon agud matul-id ang rason sang pagpangluthang.
