BACOLOD CITY – Gin-relieve na sa puwesto ang apat ka opisyal kag empleyado sang Bureau of Jail Management and Penology (BJMP) sa ciudad sang Sipalay kasunod sang gin-alegar paghimulos sang isa ka jailer sa isa ka inmate nga babayi.
Natabo ang gin-alegar paghimulos sadtong Lunes sang gab-i sa isa ka lodging house sa nasambit nga ciudad.
Ginpahayag ginhagad sang suspetsado nga si Jail Officer 1 Jay Lemuel Recto ang biktima kag ang bana sini nga priso man sa pareho nga kaso may angot sa ilegal nga druga.
Pagkatapos mag-inom, gindala ni Recto ang biktima sa lodging house kag ginhimuslan.
Pagkaaga nagreklamo ang biktima sa jail warden nga si Jail Insp. Gerald Diano nga amo ang naghimo sang report sa BJMP Region 18.
Apang suno kay BJMP Region 18 Spokesman Jail Insp. Mar Louie Salcedo, ila natukiban nga wala sa opisina sini si Diano nga kuntani yara sa duty sadtong gab-i nga natabo ang paglugos.
Yadto man sa prisuhan ang deputy warden nga si SJO4 Benjie Demasuhid apang wala ini sang ihibalo sa natabo didto rason nga nadala man ini sa gin-relieve kag subong man ang duty jailer nga si JO1 Dexter Jailo.
Bangud sini, gilayon sila gin-relieve ni BJMP Region 18 Director Jail Senior Supt. Hernan Grande.
Si Diano ang ginbuslan ni Jail Senior Insp. Angelito Almodiel bilang jail warden.
Samtang, base sa resulta sang medical examination sa biktima, positibo ini nga nahimuslan.
