Nagakoordinar ang Bago City Police Station sa Bacolod City Police Office sa pagsolbar sang kaso sang pagpangluthang-patay sa dismissed nga pulis sa Purok Michelle, Barangay Dulao, Bago City.
Madumduman nga ginbawian sang kabuhi si Renaldo Bernel, residente sang Barangay Pacol, Bago City, matapos ginpaarakan sang luthang sang ginabanta lima ka persona samtang padulong sa iya ginamanage nga manokan.
Sa interview sang Bombo Radyo Bacolod kay Police Lt. Col. Jay Malong, hepe sang Bago City Police Station, bangod may kalapit nga detachment sang 2nd Platoon sang Provincial Mobile Force Company, sila ang una nga nagresponder kag nagpatigayon sang pursuit operation.
Apang bangod sa limitado nga impormasyon wala nila nalagas ang salakyan sang mga gunman nga 4-wheeled vehicle kag sarang masakyan sang lima ka pasahero, nga sa una nga impormasyon sang Bombo News Team, isa ka Toyota Hilux.
Sa follow up investigations, mas nakatipon na sang mas maathag nga impormasyon kag ginalantaw nga sa Bacolod City ang exit route sang mga ini.
Sila ang nagakoordinar sa mga Police Stations nga mahimo lutsan, kag luyag man nga makalantaw sang mga CCTV footages sa alagyan agud matrace kun nakalabay gid man kag kun diin padulong ang salakyan sang mga suspect.
Paathag ni Malong nga sa umpisa, tatlo ka salakyan ang naglab-ot sa ila nga mahimo salakyan sang mga suspect, apang sila ang nagfocus lamang sa isa ka salakyan.
Dugang pa sini nga kunlantawon ang crime scene, yara sa likod sang biktima ang mga gunmen.
Samtang ginpasalig man sini nga 60 tubtob 70 porsyento na ang dalagan sang imbestigasyon.
Sa karun ang ginalantaw nila nga motibo amo ang trabaho kag mga nangin trabaho sini.
Suno kay Malong, sa Counter Intelligence Report sang PNP, yara ang pangalan ni Bernel nga protektor sang drug personalities sang siya ang aktibo pa nga pulis.
Kasubong man ang gina-alegar pagpatay sini kaupod sang police asset kay SPO4 Roger Cañete sang Pebrero 2015, napulo ka tuig na ang nakaligad.
Matapos madismiss sa serbisyo, si Bernel ang nagserbe man nga security escorts sang pila ka mga dalagko nga negosyante, antes nangin manager sang manokan.
