Amat-amat na nga nagadalayon ang ilig sang tubig sa Mambuloc Creek humalin sang ginsuguran ang pagpangkalkal kag pagpanghakot sang basura diri sang Pebrero 1.
Sa interview sang Bombo Radyo kay Executive Assistant to the Mayor Joemarie Vargas, cluster head sang City Disaster Risk Reduction and Management Office (CDRRMO), sang pag-ulan sang nagligad nga semana, wala na nagasupon kag nagatayuyon na ang ilig sang tubig sa creek.
Apang aminado ini nga may mga area gihapon nga may nagalutaw nga basura.
Gani ila ginapangabay ang mga pumuluyo nga indi na maghaboy sang basura sa sapa.
Magluwas sa basura, isa man sa ila mga kabudlayan amu ang dalagko nga bato kun sa diin indi ini masarangan sang isa lang katawo.
Suno sa iya, ginabanta nga matapos na ang pagpaninlo isa ka bulan humalin sang ini ang ginsuguran.
Ginatarget man sang mga ini nga mahawanan na ang mga basura antes maglabay ang bagyo.
Madumduman nga Pebrero 1 sang nagsugod ang massive excavation kag dredging operations sa Mambuloc Creek ang Mambuloc Clearing Team gamit ang bag-o nga Hidromek Amphibious Excavator sang ciudad nga nagabalor sang P28 million.
Ang amo nga pondo ang nagikan sa 2019 fund sang city government kag sang nagligad lang nga 2020 nag-abot.
