80 tubtob 90 porsyento na nga preparado ang Bacolod City sa pagpatigayon sang Bacolod Chicken Inasal Festival sa Mayo 24 tubtob 26.
Sa interview sang Bombo Radyo Bacolod kay Councilor Jason Villarosa, chairman sa Committee on Tourism sa Sangguniang Panlungsod, ginmeeting na nila nakaligad nga semana ang mga Department Heads, Stakeholders, event organizers kag mga malls kaupod kay Councilor Celia Flor, ang chairperson sa Committee on Markets.
Paathag sang konsehal nga sila ang nagtap sa SM City Bacolod, Ayala Capitol Central kag Upper East Mega Mall, ang tatlo ka magaserbe nga festival sites.
Nasugilanon naman ini sa Public Order and Safety Office (POSO), Bacolod Traffic Authority Office (BTAO), Bacolod City Police Office (BCPO), Bureau of Fire Protection – Bacolod kag Bacolod City Health Office.
Sa karun wala pa sang napresentar nga traffic plan ang BTAO para sa aktibidad.
Bwas ginalauman nga mapagwa naman ang video presentation para sa Bacolod Chicken Inasal Festival nga ipost sa facebook page ni Bacolod City Mayor Alfredo “Albee” Benitez.
Paathag sini nga plano nila nga himuon global ang Bacolod Chicken Inasal Festival kun sa diin matilawan ang nanarisari nga sahi sang pagluto sang Chicken Inasal gikan sa nagkalainlain nga lugar.
Suno diri mas dako pa ang selebrasyon nga malauman sa masunod nga tuig.
Magapakaon man sila sang libre sa home for the aged, home for the blind kag mga bahay ampunan.
Suno kay Villarosa, wala pa sila sang naimbetar nga national figures apang naka-imbetar na ang mga ini sang mga celebrity chefs ukon mga nagsikat nga mga chef gikan sa ciudad sang Bacolod nga magapakigbahin man sa kapiestahan.
Pangagda sang konsehal nga saksihan kag mag-enjoy sa Bacolod Chicken Inasal Festival.
Suno diri sila ang may beer and inasal tasting, kun sa diin sarang matilawan ang nanarisari nga luto sang Chicken Inasal sa mas barato nga presyo.
