Sa pagtingob sang ginpatigayon nga Charter Day Parade gikan sa nagkalainlain nga bahin sang ciudad sa Bacolod City Government Center kaina sang aga may kaangtanan sa selebrasyon sang 86th Bacolod City Charter Day anniversary, naghatag man sang gamay nga mensahe ang alkalde.
Nahibaluan nga magluwas sa civic parade, ang mga aktibidad ang patigayunon subong pa nga alas-5:00 sang hapon.
Sa malip-ot nga speech ni Bacolod City Mayor Alfredo ‘Albee’ Benites kaina sang aga, gindumdom sini ang maragtas sa kun paano nag-umpisa ang ciudad.
Subong nga hapon, sila ang magapatigayon man sang Charter Day Awarding Ceremonies agud mapakita kun diin na kutob ang Bacolod City.
Sila ang magahatag sang ‘Ang Banwahanon Award’ para sa mga mapilian nga indibidwal nga nakahimo sang exemplary actions para sa dugang nga kaayuhan para sa ciudad.
Suno sa alkalde sila ang may gintukod nga komitiba nga amo ang nagadeterminar sang mga deserving nga makabatun sang award.
Magluwas diri, gin-introduce man sang konseho ang ‘Be The Change Award’ nga para naman sa mga ordinaryo nga pumuluyo nga nagahimo sang ordinaryo man nga mga butang, apang nakahimo sang dako nga impact.
Plano man sang alkalde nga sa kada flag ceremony sang Bacolod City Government Center, sila ang magahatag sang pagkilala sa mga nagakadapat nga mga empleyado.
Ini agud mapakita sa mge empleyado ang importansya sang maayo nga pamatasan sa pagserbisyo sa ciudad.
Panawagan ni Benitez nga updan ang pagsaulog sang 86th Bacolod City Charter Day.
Pasalig sini nga sa iya State of the City Address (SOCA) sa Hulyo 3, talakayon sini kun diin na kita sa kaarun sa target nga mahimo nga Super City ang ciudad sang Bacolod.
