Gin-accredit sang Bacolod City Government ang 10 ka mga funeral parlor sa paghatag sang funeral assistance.
Sa interview sang Bombo Radyo Bacolod kay Department of Social Services and Development Head Alma Gustillo, ang Bacolod City Government ang maga-offer sang Funeral Service Package sa balor P10,000.
Kalakip diri ang Villacrusis Funeral Homes, Eastern Hills Funeral Services, R & S Funeral Homes, ABE Funeral Homes, Gigato-Abecia Funeral Homes, Funeraria Del Lourdes, Holy Angels Funeral Parlor kag tatlo ka iban pa.
Ang Funeral Service Package ang ginalakipan sang embalming, tatlo ka adlaw nga haya sa balay, service sa lubong kasubong man ang casket ukon lungon.
Suno kay Gustillo, ang maka-avail sang funeral package amo ang mga Bacolod Comprehensive Health Program (BacCHP) holders.
Paathag sini nga kun ang pasyente ang mapatay sa ospital, sarang makaderetso sa BacCHP hospital liaison officer, bangod ang mga ini ang magarefer sa funeral parlor.
Samtang kun indi naman sa ospital mapatay, magpadulong sa command center sang BacCHP sa annex sang Bacolod City Government Center, kag ang staff na ang magarefer sa funeral parlor.
Sa mga indi naman BacCHP holder nga luyag maka-avail sang benepisyo, makig-angot lamang sa Punong Barangay agud ini ang magakoordinar sa ila.
Aminado si Gustillo nga may iban nga may-ara na sang burial plans, kag indi na mag-avail sang balor P10,000 nga Funeral Service Package, sarang naman sila nga makabatun sang P7,000 nga Burial Cash Assistance.
