Ginahulat sang City Legal Office ang sabat sa show cause order nga ginserbe sang regular employee sang Bacolod City Legal Office nga namwersa kag naggamit sang iya posisyon sa trabaho agud indi makabayad sa gin-inom sa isa ka bar.
Madumduman nga ginkumpirmar ni Bacolod City Mayor Greg Gasataya nga napirmahan na sini ang show cause order kag ini ang naserbe na sa empleyado.
Sa interview sang Bombo Radyo kay Bacolod City Legal Office Head Atty Karol Joseph Chiu, ginpahayag sini nga ginhatagan ang empleyado sang lima ka adlaw agud makasumiter sang iya sabat sa show cause order.
Pagkatapos sini, suno kay Chiu, pagadisyunan kun may nakaigo nga basehan agud magpasaka sang formal charge kag kun dagdagan sang preventive suspension ang empleyado.
Sa karun, ang empleyado ang wala ginpahanugutan nga maka-upod sa inspection samtang nagapadayon ang imbestigasyon.
Dugang pa ni Chui, may iban pa nga complaints nga nabaton ang opisina ni Mayor Greg kag ini ang gina-verify pa.
Pasalig sini nga mangin patas sila kag magabase lamang sila sa resulta sang imbestigasyon kag sa nagakaigo ebidensya.
