Ginpahayag sang alkalde sa ciudad sang Bacolod nga failure sa bahin sang Central Negros Electric Cooperative (CENECO) ang mga nagluntad nga asod-asod kag madugay nga power outages sa ciudad.
Sa pahayag ni Bacolod City Mayor Alfredo “Albee” Benitez ang halos apat tubtob lima ka oras nga brown-out sang Abril 11 sang gab-i tubtob kaagahon sang Abril 12, ang maathag nga kapaltahan sang CENECO.
Paathag sang alkalde nga sa pagtakod sang linya sang kuryente, may-ara sang ginatalana nga tensioning ukon ginapahanugutan tatlo tubtob lima ka porsyento nga sagging ukon pagluyloy sang linya, bangod ini ang nagahugot kun tuman ka init.
Apang nakita sini nga wala sang sagging sa mga linya, gani karun nga malala ang init dala sang el niño, nagakasobrahan ang pag-expand sang kuryente tubtob nga ini ang mautod.
Sa pihak sini, nakit-an man nga madamo sang splicing sa linya ukon ginsugpon-sugpon lamang.
Suno kay Benitez, kaangay nga sa tion nga may mautod nga linya, ini ang ginasugpon lamang sang CENECO sa baylo nga islan, gani ini ang liwat nga nagatrip-off.
Pasalig sang alkalde nga sa P2 billion Capital Expenditure (CapEx) sa Joint Venture Agreement sang PrimeElectric sa CENECO ukon sa pag-operar sang Negros Electric Power Corporation (NEPC), mayorya sini ang para sa pag-ilis sang mga tuman na ka daan nga linya sang kuryente.
