Magapatigayon sang iya labing una nga State of the City Address (SOCA) si Bacolod City Mayor Greg Gasataya sa Bacolod City Government Center subong nga adlaw, Hulyo 8.
Ini ang ginkumpirmar ni Bacolod City Vice Mayor Claudio Jesus “Kalaw” Puentebella.
Suno kay Puentebella, patigayunon ang session sang Sangguniang Panlungsod alas-10:30 subong nga aga kag alas-3:00 sang hapon ang SOCA.
Suno diri, ginalauman may mga guest nga paga-imbitaron ang Alkalde.
Dugang pa, ginalauman man nga i-higlight sang Alkalde ang padayon nga pagpalig-on sang Bacolod Comprehensive Health Program (BacCHP), dugang nga suporta sa City scholars kag iban pa nga educational assistance.
Lakip man diri ang pagpasanyog sang turismo bilang kabahin sa prepaprasyon parasa Masskara Festival, padayon nga pagkay-o sang mga imprastraktura kaangay sang coliseum kag pila ka mga sports facilities agud mangin ang ciudad sa paghost sang Batang Pinoy.
Suno diri, posible man nga talakayon ni Mayor Gasataya ang natuhoy sa dissater preparedness kag iban pa nga makahatag sang bulig sa pumuluyo sa tion sang kalamidad.
