Tatlo na ang kumpirmado nga kaso sang Pertussis sa ciudad sang Bacolod.
Sa interview sang Bombo Radyo Bacolod kay Atty Ceasar Distrito, spokesperson ni Bacolod City Mayor Alfredo “Albee” Benitez, sa data gikan sa Bacolod City Health Office, tatlo sa mga specimen sample nga ginpadala sa Research Institute for Tropical Medicine (RITM) para sa confirmatory test, ang nagbalik nga positibo.
May isa naman nga negatibo ang resulta samtang padayun pa nga ginahulat ang test result sang ulihi nga specimen sample.
Ang mga positibo nga pasyente ang lunsay mga lapsag nga babayi kun sa diin sa ulihi sini nga ihibalo, isa na lamang ang nagapabilin nga naka-admit sa ospital.
Ang mga pasyente ang gikan sa Barangay Taculing, Tangub kag Villamonte.
Bangod ang Pertussis ang preventable disease, ginapanawagan ni Distrito nga pabakunahan ang mga kabataan.
Pasalig sini nga may available nga vaccine sa CHO kag sa karun, ginmanduan naman ang mga Barangay Health Workers nga sulihon ang mga anom ka tuig panubo nga unvaccinated ukon may incomplete vaccination status.
Suno kay Distrito, indi naman kinahanglan nga hulaton pa ang BHW, sa baylo dapat nga ang ginikanan na mismo ang magpadulong sa mga Health Centers agud mahatagan sang proteksyon ang ila kabataan sa kaangay nga mga balatian.
Samtang ginapanugyan man sini nga magfacemask kun nagalain ang pamatyag partikular na kun may kaupod nga kabataan nga indi bakunado.
Suno kay Distrito, ginapanawagan man sang CHO nga likawan ang pagdala sang indi bakunado nga kabataan sa mga matawo nga lugar, samtang dapat nga magsanitize sang kamot antes magkapyot sa kabataan.
