Ginakalipay sang Covid Vaccination (CoVac) Council sa ciudad sang Bacolod nga nangin manami ang resulta sang ginpatigayon nga simulation exercise sa Barangay Villamonte sang nagligad nga Biyernes santo sa evaluation sang mga tiglawas nagikan sa Department of Health (DOH) Region 6.
Sa interview sang Bombo Radyo Bacolod kay Dr. Chris Sorongon, deputy for medical data and analysis sang Emergency Operations Center sa ciudad sang Bacolod, ginpahayag sini nga base sa evaluation sang DOH-6, nakit-an nga tuman ka systematic kag preparado na katama ang ciudad sa patigayunon nga vaccination program.
Suno sa iya, may yara lang sang diutay nga mga kinahanglan nga kaayuhon.
Nahibaluan nga ang isa sa mga requirement sa preparasyon sang vaccination program amo ang pagpatigayon sang simulation exercise.
Dugang pa ni Sorongon nga ang 25 ka mga vaccination sites nga natumod sang vaccination center team sang COVAC Council ang kwalipikado base sa gin-set nga requirements sang DOH.
Nahibaluan nga ang isa ka vaccination center ang dapat nga accessible, malapit sa ospital ukon sentro, may tubig kag may facilities.
