BACOLOD CITY — Ginalauman nga matapos sa sulod sang tatlo ka tuig ang 21 kilometros nga Bacolod Economic Highway.
Ini ang pahayag ni Bacolod City Lone District Congressman Greg Gasataya kadungan sang pormal nga pagsugod sang civil works ukon construction sang una nga phase sang dalan nga nagalaba sang tres kilometros kag nagsugod sa Barangay Sum-ag kag nagabalor sang 300 milyones pesos kalakip na ang inuggasto sa road right-of-way.
Suno kay Gasataya, walo ka lane ang ginpreparar nga program of works sang amo nga dalan apang gin-una lang anay sa karun ang apat ka lane nga ginalauman matapos sa sulod sang napulo ka bulan.
Suno naman kay Engr. Leah Jamero, asssistant district engineer sang Bacolod City Engineering District sang DPWH, five billion pesos ang projected cost sang amo nga highway.
Ang una nga phase ang may target date of completion nga 303 calendar days ukon magatakop sa Pebrero 17 tuig 2018 kun sa diin may yara sang penalty ang kontraktor nga International Builders Corporation kun indi matapos.
Nagapati naman si Jamero nga matapos ang 21 kilometros nga dalan sa sulod sang tatlo ka tuig ilabi na kun wala sang problema sa road right-of-way.
