Ginpasalig sang station commander sang Bacolod Police Station 6 nga pasanyugon nila ang monitoring sa mga nagagamit sang peke nga kwarta.
Ini kasunod sang facebook post ni Bacolod City Mayor Alfredo ‘Albee’ Benitez nga nagapanawagan sa paghalong matapos nga may nakit-an nga wallet sa Libertad Public Market nga naga-unod sang mga peke nga paper bills.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, wala sang may nakareport sa ila apisar nga madamo na sang gina-alegar nabiktima sang peke nga kwarta.
Apang bangod ini ang ginpanawagan na mismo sang alkalde, pasalig ni Santillan nga pasanyugon pa nila ang pagbantay agud nga ini ang indi na magtiyog pa sa mga commercial establishments.
Aminado ini nga natabo naman sadto ang pagduging sang nagagamit sang peke nga kwarta, apang nadula man matapos nila ginpasanyog ang paglagas sa mga ini.
Gani liwat nila nga pasanyugon ang operasyon kag pahulagon ang ila intelligence personnel agud makatipon sang sang nagakaigo nga impormasyon.
Paathag ni Santillan nga may pangatubangon nga kaso ang mga nagahimo sang peke nga kwarta kasubong man ang nagagamit sini sa pagbakal.
Panawagan na lamang sini sa mga pumuluyo partikular na sa mga vendors nga usisaon sang maayo kun matuod-tuod nga kwarta ang ginabayad sang bumalakal.
Mas maayo man nga hibaluon kun paano ang pagtumod sang genuine nga kwarta gikan sa mga peke, kag kun may mahibaluan nga nagabakal gamit ang peke nga kwata, ini ang sarang mareport sa kapulisan.
