Antes pa man nagpungko ang bag-o nga Bacolod City Police Office Director, siya ang isa man ka volunteer sa Bombo Radyo sang tuig 1996.
Sa interview sang Bombo Radyo kay Police Colonel Eugene Rebadomia, tumandok sa Barangay Mansilingan, Bacolod City, siya ang ikaduha sa pito ka mag-ulutod.
Lunsay wala sang estable nga trabaho ang iya ginikanan, gani naeksperyensyahan nila ang kabudlayan sang kabuhi.
Apang bisan wala sang manggad nga ginbilin ang iya ginikanan, ini ang nangin inspirasyon kag motibasyon niya sa pagpadayon sa kabuhi kag sa pag-eskwela.
Pagkatapos sini sang high school, napilitan siya nga mag-untat anay bangud sa kakulangan sang kwarta, kag nag-ubra agud makatipon kag makabalik sa pag-eskwela.
Bilang working student, naeksperyensyahan niya nga magbaligya sang chicharon, mamulante kag mamasahero agud may pang-allowance kag panggastos sa adlaw-adlaw.
Ang tagsa ka sentimos ang iya nga ginpangabudlayan agud mapadayon ang iya edukasyon.
Nagpadayon siya sa University of Negros Occidental–Recoletos (UNO-R) kag nagtapos sa kurso nga Bachelor of Arts in Political Science sang 1997.
