Napabilin gihapon sang Tropical Depression ESTER ang iya kabaskugon, samtang ini ang ginalauman nga maggwa na sa Philippine Area of Responsibility subong nga aga.
Ang sentro sang Bagyo ang ulihi nga nasiplatan sa 380 km North Northeast sang Itbayat, Batanes.
Dala sini ang kabaskugon sang hangin nga nagadangat sa 45 km/h kag pagmadlos nga tubtob 55 km/h.
Ini ang nagahulag sa East Northeastward sa kadasigon nga 15 km/h padulong na sa East China Sea.
Wala naman sang lugar nga ginpaidalom sa Tropical Cyclone Wind Signals.
Apisar nga wala sang derekta nga epekto ang Bagyo, pabaskugon naman sini ang huyop sang Hangin Habagat ukon Southwest Monsoon nga lauman nga magapaulan sa Ilocos Region, Cordillera Administrative Region, kag Cagayan Valley subong nga adlaw.
Ang Bagyo ang ginalauman nga maggwa na sa PAR subong nga aga, samtang mapabilin naman sini ang kabaskog bilang tropical depression sa masunod nga 12 oras.
Mangin maulanon man ang panahon subong nga adlaw sa Metro Manila, Cagayan Valley, nabilin nga bahin sang Cordillera Administrative Region, nabilin nga bahin sang Central Luzon, Rizal, Cavite, Batangas, kag Occidental Mindoro bangod sa Habagat, samtang makanay naman ang panahon sa nabilin nga bahin sang pungsod, luwas sa makadali nga mga pag-ulan dala sang Localized Thunderstorms.
