Nagsanyog na sa Tropical Storm ang bagyo sa gwa sang Philippine Area of Responsibility; samtang ang Low Pressure Area sa sulod sang PAR ang wala na sang posibilidad nga magsanyog bilang Bagyo.
Ang Bagyo sa gwa sang PAR, nga ginhatagan sang International Name nga HAGUPIT, ang ulihi nga nasiplatan 1,995 km sa nasidlangan sang Northeastern Mindanao, kag yara sa karun sa kadagatan sa nabagatnan sang Guam.
Dala sini ang kabaskugon sang hangin nga nagadangat sa 65 km/h kag pagmadlos nga tubtob 80 km/h.
Sa latest satellite monitoring, ang Tropical Storm HAGUPIT ang nagahulag padulong sa nakatungdan nga dereksyon sa kadasigon nga 20 km/h.
Ang Bagyo ang magapadayun sa nakatungdan nga dereksyon sa masunod nga anom ka oras antes magliko sa west northwestward nga dereksyon.
Ini ang ginalantaw nga magsulod sa PAR sa Sabado sang gab-i ukon sa Domingo sang aga, kag hatagan sang Local Name nga Bagyo CALOY.
Ginalauman nga magabaskog pa ang Bagyo HAGUPIT sa masunod nga 48 oras, apang dako ang posibilidad nga amat-amat nga magahuyang sa Tropical Depression bangod sa indi paborable nga kondisyon sa Philippine Sea pag-abot sang Martes.
Ang Bagyo ang wala pa sang derekta nga epekto sa tiyempo sa Pilipinas sa masunod nga tatlo ka adlaw.
Sa pihak nga bahin, ang LPA sa sulod sang PAR, ang ulihi naman nga nasiplatan sa 120 km sa nabagatnan-nasidlangan sang Hinatuan, Surigao del Sur.
Sa forecast alas-2:00 kaina sang kaagahon, wala na sang tyansa nga madevelop bilang Bagyo ang nasambit nga LPA, kag may posibilidad nga ini ang magahuyang pa tubtob nga matunaw.
Samtang Easterlies ukon ang mainit nga hangin gikan sa Dagat Pacifico naman ang nagaapekto sa Luzon kag Visatas.
Lauman ang lapta-lapta nga mga pag-ulan sa atun sa Negros Island Region, Central Visayas, Eastern Visayas, Caraga, Northern Mindanao, Davao Region, kag Zamboanga Peninsula, nga epekto sang LPA.
Samtang mangin mainit kag mapaang gihapon ang panahon sa nabilin nga bahin sang pungsod nga apektado sang Easterlies.
