Nagdangat sa bag-o nga record nga P60.10 kada US dollar ang balor sang piso sa pagsara sang trading kahapon, ini na ang pinakamahuyang nga balor sang piso sa maragtas sang Pilipinas.
Narehistro ang intraday low nga P60.40 kag average nga P60.16 matapos mag-umpisa sa P59.9 ang opening rate.
Suno sa mga analyst, ini ang bangud sa nagapadayon nga pagsaka sang presyo sang langis sa global market dala sang kinagamo sa Middle East.
Nangin mas mabaskog man ang dolyar bangud sa pagsaylo sang mga investor sa safe-haven assets.
Nagpahayag ang Bangko Sentral ng Pilipinas (BSP) nga padayon sini nga ginabantayan ang sitwasyon kag handa nga mag-intervene kun kinahanglanon.
Nagapati ang pila ka mga ekonomista nga ang mahuyang nga piso ang magaduso sang mas mahal nga presyo sang mga gina-import nga produkto ilabi na sang petrolyo.
Bangud sini, ginalauman nga magasaka pa ang inflation kun magpadayon ang pagnubo sang piso batuk sa dolyar.
