Napasakaan na sang kaso nga parricide ang bana nga nagpatay sa iya misis sa atubang mismo sang ila nga mga kabataan sa banwa sang Cauayan diri sa probinsya sang Negros Occidental sang Enero 13.
Nahibaluan nga bangud sa baisay angot sa kapaslawan sang bana nga ipakay-o ang ila balay samtang nagatrabaho sa malayo ang iya misis, ginpatay sang mister ang iya asawa sang Miyerkules.
Duha na ka tuig nga nagatrabaho sa Manila ang 50-anyos nga si Presila Mendiona kag nagpauli ini sa ila puluy-an sa Purok 1, Barangay Yao-yao sang Disyembre 19 agud magproseso para sa national ID.
Apang nakibot ini nga wala napakaayo ang ila balay kag halos indi na matulugan apisar masami ini nagapadala sang kwarta sa iya bana nga si Eduardo.
Bangud sini, nagbaisay ang mag-asawa tubtub gingutrab sang mister ang liog sang iya misis gamit ang flaminco sa atubang sang duha nila ka kabataan nga lunsay menor de edad.
Sa interview sang Bombo Radyo kay Police Major Lowell Garinganao, hepe sang Cauayan Municipal Police Station, isa ka barangay tanod ang suspetsado kag bangud madamo ang nakakilala sa iya, may nabaton sila nga impormasyon nga nagapanago ini sa nabukid nga bahin sang ila banwa.
Suno kay Garinganao, ila ini ginpadulungan kaupod ang mga katapo sang Philippine Army agud arestuhon kag sang Biyernes, natigayon ini nga mapasakaan sang kaso nga parricide.
Suno sa hepe, pursigido gid ang mga kabataan ni Mediona nga magpasaka sang kaso batok sa amay kag apisar nga ginatestingan niya istorya ang iya mga kabataan, wala siya ginasapak sang mga ini.
Sa karun, nakahunong si Mendiona sa Cauayan Municipal Police Station kag wala ini ginrekomendahan sang piyansa.
