Kun kaisa may mga kahigayunan nga kun may yara kita i-process nga mga dokyumento ukon luyag nga kuhaon nga bagay apang kun kaisa indi mahapos ang pagkuha sini bangud kinahanglan sang mga pamatuod.
Kaangay lamang sa natabo sa South Africa matapos nga nangin tensyonado ang sitwasyon sang Capitec Bank matapos nga ang isa ka pamilya ang wala mapunggan ang kaakig kag gindala ang bangkay sang ila himata sa sulod sang opisina sang bangko.
Santo sa report kag sa nagwa nga video ang bangkay nga naputos kag ginbutang sa salog malapit sa customer service area.
Suno sa pamilya, napilitan sila nga himuon ang nasambit nga tikang bilang ebidensya sang kamatayon sang ila himata matapos nga nabudlayan sila sa pagkuha sang iya sini nga funeral insurance.
Ang insidente naghatag sang kahadlok sa mga empleyado kag customer gani madamo ang nagdalagan pagwa kag temporaryo nga ginsarado ang bangko para sa seguridad kag sanitasyon.
Sa pihak nga bahin, ang mga bank executives ang nagpagwa na sang pahayag agud maklaro ang proseso.
Suno sa ila, ginpahanumduman nila ang mga kliyente nga ang death certificate lang kinahanglan sa pagproseso sang funeral insurance kag indi na kinahanglan nga dal-on ang mismo nga bangkay.
Sa karun, gina-imbestigaran na sang kompaniya ang insidente agud masiguro nga indi na matabo liwat ang insidente.
