Ginalantaw nga mahimo naigo sang kilat ang 36 anyos nga mamumugon nga nasapwan patay sa Hacienda Sto. Niño Agho, Brgy Dos Hermanas, Talisay City.
Ang biktima ang ginkilala lamang nga si Alyas Rudy, 36 anyos, kasado, mamumugon, residente sa nasambit nga lugar.
Sa inisyal nga impormasyon sang Talisay City Police Station, nasapwan ang bangkay sang biktima nga may mga pilas sa nagkalainlain nga bahin sang lawas alas-9:10 kahapon sang aga.
Pahayag sang pamilya nga naghalin sa balay ang biktima alas-2:00 sang hapon sang Miyerkules, Setyembre 23, agud magpadulong sa iya trabaho sa katubuhan sa nasambit man nga area.
Apang alas-6:00 sang gab-i, waay pa ini gihapon makapauli, indi kaangay sa masami sini nga tion sang pagpuli.
Gani siya ang ginpangita na sang iya manghod nga babayi sa balay sang ila iloy, nga masami sini nga ginahapitan kun indi gilayon makapauli.
Bangod wala sa iloy, gintsekyar man nila ang balay sang ila tiyo, apang wala man ang biktima.
Naagahan na lamang wala pagid makita ang biktima, gani nagpadulong ang iloy kag manghod sini sa iya ginatrabahuan nga kampo, kag didto na nasapwan ang bangkay nga madamo sang pilas.
Ini ang gindala sa Talisay City Health Office para sa medical examination.
Sa initial findings, nakita nga ang kamatayon ang tuga sang electrical exposure, kag wala man ginadula ang posibilidad nga ini ang naigo sang kilat.
Sa karun padayun pa nga nagapatigayon sang dugang nga imbestigasyon sa insidente.
