BACOLOD CITY – Ginpatigayon na ang exhumation sa bangkay ni Mary Joy Geronca kag sang kapid sini nga lapsag sa Handumanan Public Cemetery kahapon agud mahibaluan ang gin tunaan sang kamatayon sang mga ini.
Mismo si Dr. Nicasio Botin, medico legal offcer sang National Bureau of Investigation (NBI) region 6 ang nag kalkal sa bangkay sang iloy nga gin-alegar napatay bangud sang kapabayaan sang Corazon Locsin Montelibano Memorial Regional Hospital .
Personal man nga nagbulig kay Dr. Botin sa pag patigayon sang autopsy ang amay sang biktima nga si Jose Cesar Penario.
Suno sa amay, ginkuhaan sang mga tissue ang bangkay sang iya bata kag sang mga lapsag .
Suno naman diri, wala sang nakita nga problema si Dr. Botin sa mga lapsag apang nag pahayag ini nga kun nakita kuntani nga emergency ang kahimtangan ni Mary Joy dapat nga gilayon ini nga gin asikaso bangud posible nga natabangan pa ini.
Sa karun gina-pasumiter na ni Dr. Botin sa pamilya ang ang resita sang mga bulong nga gin hatag diri sang regional hospital.
Sa bahin naman ni Dr. Botin indi pa sini matumod ang gin tunaan sang kamatayon sang iloy bangud nga kinahanglan pa nga ipadala sa Manila agud ipa-examine ang sample sang mga tissue nga ginkuha sa biktima.
Kag indi mapat-od ni Dr. Botin kun san-o ini.
Ang resulta sang eksaminasyon ang iga-dugang naman sa imbestigasyon sang NBI nga posible magamit sang pamilya sa pagpasaka sang kaso batok sa staff sang regional hospital nga nag-asikaso kay Geronca.
