Wala na sang kabuhi sang nasapwan ang isa ka lalaki nga naga-utaw utaw malapit sa sea wall sang Bredco Port, Purok Lampirong, Barangay 2, Bacolod City subong nga gab-i.
Suno kay Police Major Eugene Tolentino, station commander sang Bacolod Police Station 2, kaina sang aga pa nanotisyaran sang mga residente nga may sako nga nagalutaw malapit sa sea wall apang ila gin-abi nga ini ang basura lamang.
Subong nga gab-i lamang ini ginpatsekyar kag nadiskubrehan nga ini ang bangkay sang isa ka lalaki nga nakagapos ang tiil kag kamot.
Nakahigot sa sako ang bangkay kag daw kaangay nga ginpilpilan ini sang bato agud indi maanod.
Ang lalaki, nga sa karun wala pa matumod ang identity, ang wala sang pang-ibabaw nga panapton kag nakashorts nga itom.
Sa karun ginturn-over na sang kapulisan ang bangkay sini sa Scene of the Crime Operations (SOCO) para sa eksaminasyon kag imbestigasyon.
