Handa ang punong barangay sang Barangay 35, ciudad sang Bacolod nga atubangon sa korte ang kaso nga ginpasaka sang mga pumuluyo batok sa iya may kaangtanan sa anomaliya sa Social Amelioration Program (SAP).
Nahibaluan nga ginkasuhan ini sang Graft and Corrupt Practices Act kag pagbayolar sa Bayanihan to Heal As One Act.
Sa interview sang Bombo Radyo Bacolod kay Punong Barangay Ruben James Miranda, ginpahayag sini nga nakahanda siya nga magdepensa sang iya kaugalingon sa korte upod ang iban pa nga ginkasuhan bangud nagapati ini nga wala siya sang sala nga ginhimo.
Suno kay Miranda, kalabanan sa mga nagreklamo nga mga pumuluyo amo ang mga 4Ps beneficiaries.// Suno diri, pamatud-an sang mga nagareklamo sa korte kun may yara gid man ini sang anomaliya nga ginhimo kag husto ang ila nga alegasyon.
Pananglitan nga indi nila mapamatud-an, mapasaka ang punong barangay sang kaso nga Moral Damages batok sa mga nagreklamo.
Nagapati man si Miranda nga personal interest kag pinulitika ang rason kun ngaa may yara sang nagreklamo.
Nahibaluan nga may yara sang kabug-usan nga 2,121 ka mga SAP beneficiaries ang Barangay 35 kun sa diin 477 diri amo ang leftout families.
