BACOLOD CITY — Diri sa Negros Occidental una nga naghibi ang ginbansagan nga Basilan soldier-trailblazer nga si Lieutenant Col. Elmer Suderio sang Santa Barbara, Iloilo.
Si Suderio ang nagapungko sa karon nga executive assistant sang commanding general sang Philippine Army nga si Major General Rolando Joselito Bautista.
Sa interview sang Bombo Radyo, ginpahayag ni Suderio nga nagsulod siya bilang miyembro sang Scout Ranger Company sang nakagraduate ini sa Philippine Military Academy bangud luyag niya nga mangin combatant.
Una ini nga na-assign sa CHICKS area sang Negros Occidental nga nagasakop sang Candoni, Hinobaan, Ilog, Cauayan, Kabankalan kag Sipalay.
Kun kaisa, nagalab-ot man ini sa Bayawan City sa Negros Oriental.
Sang tuig 1993 suno kay Suderio, masami naga-engkwentruhanay ang gobyerno kag ang New People’s Army.
Sa isa ka engkwentro sa Barangay Isio sa banwa sang Cauayan, nahamulag sa tropa si Suderio kag nasugata sini ang isa ka miyembro sang NPA nga nagabitbit sang M16 rifle.
Bangud sa kahadlok nga siya ang una nga mapatay, gintiro ni Suderio ang NPA member nga gilayon nga ginbawian sang kabuhi.
Naghibi ang scout ranger bangud ini ang labing una nga kahigayunan nga nakapatay siya sang tawo.
Suno diri, nagtulo ang iya luha bangud indi siya born killer apang kabahin ini sang iya trabaho.
Tuig 1995 sang ginpull-out sa CHICKS area ang battalion ni Suderio kag sila ang ginsaylo sa Mindanao.
