Hugot ang pagbantay sang Bacolod City Police Office sa Commission on Election- Bacolod subong nga adlaw sa pag-umpisa sang filing sang Certificate of Candidacy.
Sa interview sang Bombo Radyo kay Bacolod City Director Police Col. Joeresty Coronica, nagakoordinar ini sa COMELEC- Bacolod agud nga matawhay ang pagpatigayon sang isa ka semana nga filing sang COC.
Ang ulihi nga adlaw sang filing sang COC ang tubtob na lamang sa Oktobre 8, alas- 5:00 sang hapon.
Suno diri, may yara sang Police Assitance Desk nga ginhamtang sa opisina sang Liga ng mga Barangay, ginkordon ang gwa nga area sang COMELEC agud indi makasulod ang supporters, samtang nakastandby man ang mga kapulisan kag Quick Reaction Team.
Samtang, ginhatagan sang directives ni BCPO director Police Col. Joeresty Coronica ang mga kapulisan sa role sang mga ini sa filing sang COC.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, gina-emphasize sini sa mga poltical leaders nga sundon ang rule of law kaangay na lamang nga likawan ang pagdala sang ginadumilian nga mga bagay kag magsunod sa guidelines sang COMELEC.
Samtang, ginmanduan naman ang mga kapulisan nga wala sila dapat sang contact sa mga kandidato agud malikawan ang isyu.
Suno kay Bonilla, ang politika sa ciudad sang Bacolod ang wala gid man sang dako nga pagbunggo-anay sang mga kandidato kag tubtob lamang sa pagbuya sang mga hambalanon kun may pagkontrahanay.
Mensahe sini sa tanan nga magdaog sa 2025 Midterm Elections ipakita sa mga pumuluyo nga maayo nga leader ang ila ginpili para sa ciudad sang Bacolod.
