BACOLOD CITY — Nagalaom ang Bacolod City Police Office nga indi mangin ningas-kugon ukon una lang ang kasaw sang mga police stations sa ciudad sa kampanya kontra iligal nga pasugal.
Ini matapos nga nagmandu ang national headquarters nga papason ang illegal gambling sa sulod sang 15 ka adlaw nga magatakop naman subong nga adlaw, Martes.
Suno kay BCPO spokesperson Police Supt. Noel Polines, may yara sang tatlo ka operators sang illegal gambling sa Bacolod amo gani nga indi lang quota sa dinakpanay ang ginahatag sa mga police stations kundi total stop ukon pagdula gid sang tanan nga sahi sang pataya.
Aminado si Polines nga panghangkat ini sa tanan nga station commanders bangud dapat nga mangin gambling free ang ciudad.
Apang kun lantawon ang accomplishment report suno kay Polines, nagasaka-panaog ang statistics bangud nagauntat man ang mga ini sa operasyon kun ila nahibaluan nga nagapangdakop ang mga pulis kag nagabalik naman kun magkanay-kanay na.
Bangud sini, nagalaom ang opisyal sang BCPO nga mangin tayuyon ang operasyon sang mga kapulisan agud nga matuman ang mandu sang national headquarters.
